حاسه إني مكســــــــوره أوي عرفه إن القرار صعب
أصعب من أصعب حاجه ممكن حتى إني اتصورها
بس انت مسبتليش اختيار تاني
كدبك عليا كسرني
قسوتك عليا كسرتني
بعدك عني كسرني
كنت دايما مستقويه بإنك جنبي
بس دلوقتي انا لوحدي
خايفه من كل حاجه
لا في ضهر يسندني
ولا حضن يطبطب عليا
هقدر أبعد قد ايه؟
مش عارفه..
يومين
شهرين
سنه
ههرب لحد فين؟
طيب لو هربت منك
ههرب من نفسي إزاي
ههرب من زكرياتنا ازاي
ههرب من كل حاجه بشوفك فيها ازاي
ما انا بشوفك في كل حاجه
ههرب من كل شارع مشينا فيه؟
ما احنا مشينا سوا في كل الشوارع
هننسى؟
هننسى ازاي
واحنا معجونين ببعض؟
والسنين الي فاتت علينا واحنا سوا
كأننا كنا في الدنيا
بس في دنيا غير الدنيا
انت عارف ان في حاجات كتير اول مره اخد بالي منها
اول مره اخد بالي ان الدنيا حر
اول مره اخد بالي ان الدنيا فيها روايح تانيه غير ريحة الورد
اول مره اخد بالي ان في ناس ماشيه في الشارع مكشره
انا معاك كنت بس بشوف الحاجات الحلوه
بس اتضح ان مش كل الحاجات حلوه
ومش كل البشر فرحانين
ازاي روح واحده هترجع تتقسم تاني على جسمين
ايه العذاب ده
يا رب رحمتك
No comments:
Post a Comment