أنا بحب البحر جدا
بحسه راجل عجوز اوي وحكيم اوي ...بحب اتكلم معاه
بجد بحس انه بيسمعني
برتاح اوي
بحس اني برمي كل حاجه فيه
بفضفضله
بشتكيله
بحكيله
واجمل ما بيكون البحر وقت الغروب
لما بيتقابل هو وحبيبته الشمس
بيحضنها
بتبوسه
وبعدين تدوب فيه
....
انت عارف ان فيك كتير اوي منه
رقتهوحنيته وجماله لما بيكون هادي
ثورته وجنونه في الليالي الي مفيهاش قمر
غموضه
افتكرت اغنية نجاة
اول مره احس ان الأغنيه اتغنت ليك انت
انا بعشق البحر
زيك يا حبيبي حنون
وساعات زيك مجنون
..
وحشتني أوي
في اللحظه دي نفسي انا وانت نبقى زي الشمس والبحر
تحضني
تحتويني
تدوب فيا وادوب فيك
..
..
بس انت بعيد اوي عني
عمر الاماكن والمسافات ما بعدت بينا
بس انا حسه انك بعيد
بعيد باحساسك
مش لاقياك
ومش فهماك
مش لاقيه مبرر لبعدك
دي زوبعه في فنجان وهتعدي
ولا دي ريح هتقلب حياتنا
..
ارجوك ارجع
ارجع عشان محتاجالك
عشان بحبك
No comments:
Post a Comment